Իրանի Իսլամական Հանրապետության նախագահ Մասուդ Փեզեշքիանը Հայաստանի Հանրապետությունում Կենսաբազմազանության մասին կոնվենցիայի կողմերի 17-րդ համաժողովի (COP17) առաջնորդների գագաթնաժողովում ընդգծել է կենսաբազմազանության պահպանության կապը համաշխարհային խաղաղության, անվտանգության և առողջության հետ։ Նա կոչ է արել ստեղծել արդյունավետ, թափանցիկ և կիրառելի մեխանիզմներ՝ պատերազմի պայմաններում բնական ժառանգության և կենսաբազմազանության պահպանությունն ապահովելու համար։ Իրանի Իսլամական Հանրապետության նախագահը 2026 թվականի հոկտեմբերի 16-ին, ժամանել է Հայաստան՝ գագաթնաժողովին մասնակցելու նպատակով։ Ժամանման պահին նրան դիմավորել է Հայաստանի փոխվարչապետ Մհեր Գրիգորյանը։ Այցի ընթացքում նրան ուղեկցել է նաև Իրանի Իսլամական Հանրապետության արտաքին գործերի նախարար Սեյեդ Աբբաս Արաղչին։ Իր ելույթում Փեզեշքիանը, անդրադառնալով մարդկության ապագայի համար բնության պահպանության կարևորությանը, նշել է, որ կենսաբազմազանությունն այլևս զուտ գիտական կամ բնապահպանական հարց չէ, այլ անմիջականորեն կապված է խաղաղության, անվտանգության, առողջության, պարենային և ջրային անվտանգության, ինչպես նաև սերունդների միջև արդարության հետ։ Ընդգծելով կենսաբազմազանության պահպանության ներուժը՝ որպես խաղաղության դիվանագիտության կարևոր ուղղություններից մեկը՝ նա նշել է, որ միջազգային հանրությունը պետք է ընդունի, որ պատժամիջոցների ենթարկվող կամ ռազմական ագրեսիայի ենթարկված երկրները չպետք է միայնակ կրեն պատերազմի և պատժամիջոցների բնապահպանական հետևանքների բեռը։ Իրանի Իսլամական Հանրապետության նախագահը վերահաստատել է նաև Իրանի հանձնառությունը Կենսաբազմազանության մասին կոնվենցիային և բնության պահպանության համաշխարհային նպատակներին։ Նա դատապարտել է ագրեսիվ պատերազմների կործանարար ազդեցությունը շրջակա միջավայրի վրա՝ այդ հետևանքները բնութագրելով որպես «էկոցիդ» կամ բնապահպանական ցեղասպանություն։ Եզրափակելով իր ելույթը՝ նա կոչ է արել միջազգային հանրությանը քայլեր ձեռնարկել՝ պատերազմի պայմաններում բնական ժառանգության և կենսաբազմազանության պահպանության համար արդյունավետ, թափանցիկ և գործնականում կիրառելի մեխանիզմներ ստեղծելու ուղղությամբ։